சகல கலா வல்லவர் - கமல ஹாசன்

சினிமாவைப் பற்றிய அத்தனை துறைகளிலும் அறிவைப் பெற்ற இந்தியக் கலைஞர்கள் யார்? யார்? என்று விரல் விட்டு எண்ணத் தொடங்கினால் அதில் முக்கியமாக கமல் அவர்கள் இருப்பார்.

முதல் படத்திலேயே (களத்தூர் கண்ணம்மா) சிறந்த குழந்தை நட்சத்திரத்துக்கான தேசிய விருதைப் பெற்றவர் கமல்!

இந்த படத்தில் நடிப்பதற்காக கமல் ஏவிஎமில் சென்ற பொழுது அவரை தூக்கி சென்றவர் பிரபல இயக்குனர் எஸ்.பி. முத்துராமன் அவர்கள்.

இந்த களத்தூர் கண்ணம்மாவில் நடிப்பதற்கு காரணமாக இருந்தவர் டாக்டர் சாரா ராமச்சந்திரன்.இவர் கமலின் தாயாருக்கு நெருங்கிய தோழி.

1967 - ல் டி.கே.எஸ். நாடக குழுவில் சேர்ந்து நடிக்க ஆரம்பித்தார் கமல். நடித்த முதல் நாடகம் 'அப்பாவின் ஆசை'.

சிறு வயதிலேயே கதகளியும்,கதக் நடனமும்,பரதம்,குச்சுபுடி கற்றுக்கொண்டவர்.

குங்ஃபூ, கராத்தே, மல்யுத்தம், குத்துச்சண்டை, சிலம்புச்சண்டை போன்றவற்றை கூடுதல் கவனம் செலுத்தி கற்றுக் கொண்டவர்.

தமிழ், மலையாளம், தெலுங்கு, கன்னடம், ஹிந்தி, பெங்காலி போன்ற பல மொழிகளில் நடித்து கலக்கியவர்...

பிரசாத் ஸ்டூடியோவில் அகேலா கிரேன் இறக்குமதி ஆகிருந்தது. அதை இரவோடு இரவாகச் சென்று பார்த்த முதல் நபர் கமல். பிறகு தான் பி.சி.ஸ்ரீரிராம் போன்றவர்கள் வந்து பார்த்தார்கள். தொழில் நுட்பத்தின் மீது கொண்ட தீராத ஆர்வம் தான் காரணம்..

இப்படி ஒவ்வொன்றையும் கற்றுக்கொள்வதில் மிகவும் ஆர்வம் உள்ளவர்.

நடனக் கலையைப் பயின்ற போது கமல் சொந்தமாக கலை நிகழ்ச்சிகளை நடத்த ஒரு குழுவை அமைத்தார். அவரது தலைமையில் அந்த குழுவில் சுமார் 20 பேர் இருந்தார்கள். அந்த குழுவுடன் மகாராஷ்டிரா மாநிலத்தில் போலிஸ் கலை நிகழ்ச்சிகள் என்ற பெயரில் சுமார் நான்கு மாத காலங்கள் தங்கி, தனது குழுவினருடன் என்பதற்கும் மேற்பட்ட நிகழ்ச்சிகளை நடத்தினார். அந்த சமயத்தில் கிருஷ்ணகுமாரி என்ற சின்னஞ்சிறு பெண்ணும் கமல் குழுவில் நடனமாடி வந்தாள். பார்ப்பதற்கு மிகவும் அழகாக தேவதை போல் இருந்த அந்தப் பெண்ணின் மீது 16 வயது கமலுக்கு அளவற்ற பிரேமை - காதல் என்று கூட சொல்லலாம். இருவரும் இணைபிரியாமல் நட்புடன் பழகினர். அந்த பெண்ணையே மணந்து கொண்டு நாட்டியப் பள்ளி ஒன்றை ஆரம்பித்து நடத்த வேண்டும் என்றெல்லாம் கமலின் மனதில் ஆசை ஊற்றெடுத்ததாம். ஆனால் எதிர்பாராதவிதமாக கிருஷ்ணகுமாரி நோயால் தாக்கப்பட்டு இறந்த போது கமலின் கண்களில் கண்ணீர் அருவியானது.

பிறகு மனதை ஒருவாராக தேற்றிக்கொண்டு சினிமாவில் நடன இயக்குனராக முயற்சியைத் தொடர்ந்தார் கமல். கமலுடன் ஆரம்ப காலத்திலேருந்தே நெருங்கி பழகி முதலில் கமலை உணர்ச்சிகள் என்ற படத்தில் கதாநாயகனாக அறிமுகப்படுத்தி எடுத்தவர் ஆர்.சி.சக்தி அவர்கள்.
ஆனால் அதற்கு முன்பே கன்னியாக்குமாரி என்ற மலையாளப்படம் வெளிவந்தது..  பட்டாம் பூச்சி படம் வந்தது.ஆனால் தமிழ்திரையுலகிற்கு அடையாளம் காட்டிய பெரும்பங்கு இயக்குனர் பாலசந்தர் அவர்களையே சாரும். பாலசந்தர் யூனிட்டில் கமல் இடம்பிடிக்க முக்கிய காரணமாக இருந்தவர் காதல் மன்னன் ஜெமினி கனேசன் அவர்கள்.

அரங்கேற்றம் படத்தில் நடிப்பதற்காக கமல் 40 நாட்கள் படப்பிடிப்பிற்கு சென்றார். அதற்காக அவருக்கு கிடைத்த ஊதியம் 300 ரூபாய் தான். அதாவது தினம் 10 ரூபாய்.அதற்கு பாலசந்தர் கமலிடம் சொன்ன வார்த்தை... "இன்றைக்கு 300 ரூபாய் சம்பளம் வாங்கும் நீ மூன்று லட்சம் சம்பளம் வாங்கும் நாள் தொலைவில் இல்லை" என்றாராம்.

பரமகுடியில் பிறந்த கமலின் தந்தையார் பெயர் டி.சீனிவாசன் , தாயார் பெயர் ராஜலக்சுமி ... இதை லாவகமாக கவிஞர் வாலி அவர்கள் தசவதாரம் படத்தில் கல்லை மட்டும் கண்டால் பாடலில் முதல் சரணத்தில் "ராஜலெட்சுமி நாயகன் சீனிவாசன் தான் 
சீனிவாசன் சேய் இந்த விஷ்ணுதாசன் தான்" என்று வரிகளை எழுதிருப்பார்.

'குடும்பத்தோட நான் வளர்ந்த சூழல் தான் கமலின் சினிமா பயணத்தின் ஆரம்பம். அவருக்கு ஐந்து வயசு இருக்கும்போதே எந்த விசயமாக இருந்தாலும் 'நீங்க என்ன நினைக்கிறீங்க?ன்னு அவர்கிட்ட வீட்ல கேப்பாங்களாம். இந்த கேள்வியை கேட்டாலே உற்சாகமாகிவிடுவாராம்.சின்ன வயதில் அவருடைய கருத்துக்குக் கொடுத்த முக்கியத்துவமும் மரியாதையும்தான் அவருடைய தனித்தன்மையை அவருக்கே புரிய வைத்திருக்கிறது.

எம்.ஜி.ஆருக்கு'நான் ஏன் பிறந்தேன்', சிவாஜிக்கு 'சவாலே சமாளி', ஜெயலலிதாவுக்கு 'அன்பு தங்கை' படங்களில் டான்ஸ் மாஸ்டராகப் பணியாற்றி இருக்கிறார் கமல்!

இதில் கமலின் நடன அசைவுகளையும் கமலின் நோஞ்சான் உடம்பையும் கூர்ந்து கவனித்த எம்.ஜி.ஆர்., ஒரு நாள் கமலை அழைத்து உடலை வலுப்படுத்திக்கொள்ள வேண்டும் என்று அட்வைஸ் சொன்னதோடு சில உடற்பயிற்சிகளை செய்தும் காட்டி தொடர்ந்து அப்படி செய்துவர வேண்டும், அப்பொழுது தான் உடல் வலுப்பெறும் புது பொழிவு பெறும் என்றார். மக்கள் திலகம் சொன்னதை இன்று வரை மனதில் வைத்து அவற்றை செய்து வருகிறார் கமல்.

'நினைத்தாலே இனிக்கும்' படம்தான் கமலும் ரஜினியும் சேர்ந்து நடித்த கடைசிப் படம்.

ரஜினிக்குப் பிடித்த படமான 'முள்ளும் மலரும்' படம் வெளியாவதற்குக் காரணமாக இருந்தவரே கமல் தான்!
ரஜினி ஒரு ஆரோக்கியமான போட்டி.. ஒரு போட்டி இருந்தால் தான் நமக்குள் ஒரு உற்சாகம் கிடைக்கும். அந்த ஒரு ஆரோக்கியமான போட்டி எனக்கு கொடுத்தவர் ரஜினி! அந்த போட்டிக்கிடையே எங்களுக்குள் இருக்கிற நட்பு கொள்ளை அழகு.

தமிழ் திரையுலகில் கொடிகட்டி பறந்து உலகப்புகழ் பெற்ற இரு ஜாம்பவன்கள். உண்மையில் நெஞ்சை நிமிர்த்தி மார்தட்டிக்கொள்ளலாம் இவர்களை போல் நெடுங்காலம் நல்ல நட்புடன் ஆரோக்கிய போட்டியுடன் வலம் வருபவர்கள் யார் என்று.
நடிகர் நாகேஷுக்கும், கமலுக்குமான உறவு 'அப்பா- மகன்' உறவு போன்றது. தன்னை 'கமல்ஜி' என்று நாகேஷ் அழைக்கும்போது, 'எதுக்கு அந்த ஜி' என்ற கமலிடம் , ' கமலுக்குள்ளே ஒரு நாகேஷ் இருக்கலாம். ஆனால், நாகேஷ்க்குள்ள ஒரு கமல் இருக்க வாய்ப்பே இல்லை' என்பாராம் நாகேஷ்!

"எனக்கு பிடித்தவர்களின் ஆசையை நிறைவேற்ற நான் செய்த முட்டாள்தனமான காரியம்தான் திருமணம் என்று ஒரு பேட்டியில் ஒப்பனாக சொல்லிருக்கிறார். பின்னே காந்தியின் தீவிர பக்தர் அல்லவா இவர்.

ஆர்.சி. சக்தி அவர்களின் உந்துதலால் கமல் எழுதிய முதல் கதை 'இனிக்கிளி' இந்த கதை தான் மலையாள இயக்குநர் சங்கரன் நாயர் இயக்கத்தில் 'ராஸலீலா' படமானது.

இவர் எழுதிய 'தாயம் ஒண்ணு' நாவல் பிரபல இதழில் தொடர் கதையாக வெளிவந்து 'ஆளவந்தான்' திரைப்படமானது.


ஒரு காலத்துல விடியற்காலையில் குளிச்சிட்டு ஈரத்துணியோடு பூஜையை முடிச்சிட்டு, வீட்ல இருக்குறவங்களுக்கு தீர்த்தம் கொடுத்திருக்கார்.

மூன்று முறை தேசிய விருதை வாங்கியவர்... ஃபிலிம்ஃபேர் விருதை 18 முறைக்கு மேல் வாங்கிய ஒரே இந்திய நடிகர் கமல்தான்!

அவர் வாங்கிய விருதுகளை மட்டுமே பதிவிட்டால் பல தனிப்பதிவுகளே இடலாம் ...

ஒரு வானொளி நிகழ்ச்சியில் கலந்து கொண்ட கமல் தொலைபேசி உரையாடலில் எய்ட்ஸால் பாதிக்கப் பட்டோருடன் உரையாடி அவர்களின் வலியை பகிர்ந்துகொள்ளும் நிகழ்ச்சி... இதில் உள்ளம் கலங்கிய கமல் உடனே எய்ட்ஸால் பாதிக்கப்பட்ட குழந்தைகளை தத்தெடுத்துக்கொண்டார்.

புகழ்மிக்க கல்வி நிறுவனத்தில் மகள் ஸ்ருதியை சேர்க்க விரும்பினார் கமல். விண்ணப்பம் நிரப்பித் தரும்படி கேட்டார்கள். மதத்துக்கு எதிரே 'இந்தியா' என்றும் , ஜாதிக்கு எதிரே 'தமிழ்' என்றும் எழுதிக் கொடுத்தார்." நடைமுறை சட்டத் திட்டங்களுக்கு உட்பட்டு எழுதாத காரணத்தால் உங்கள் குழந்தைக்கு இங்கே இடம் இல்லை" என்றது பள்ளி நிர்வாகம். "எனது மதமும், நாடும் முறையே இந்தியா, தமிழ் தான். இதை உங்களால் ஏற்றுக் கொள்ள முடியவில்லை என்றால் பரவாயில்லை. இந்த லட்சணத்தில் நீங்கள் என் பிள்ளைக்கு சொல்லிக் கொடுக்கும் உயர் தரக்கல்வி தேவையில்லை" என்று சொல்லிவிட்டு வெளியேறினார் கமல்.

பிறகு ஸ்ருதியின் பிறப்புச் சான்றிதழில் மதத்துக்கான இடத்தை வெற்றிடமா தான் விட்டிருக்கிறேன். போராடித்தான் அந்த சான்றிதழை வாங்கினேன். என்ன மதம்னு அப்ளிகேசனில் கேட்காத பள்ளியில்தான் மகள்களைப் படிக்க வச்சேன். என்னுடைய கொள்கைகளை எந்த சந்தர்ப்பத்துலும் விட்டுக் கொடுக்க மாட்டேன் என்று கமல் கூறியுள்ளார்.

கமல் மறுப்புக்கொள்கையைக் கொண்டவர் என்றாலும்,
ஆத்திகத்தை கமல் விமர்சனம் செய்வதில்லை!

வீட்டில் நிறைய நாய்களை வளர்க்கிறார். கொஞ்ச காலத்துக்கு முன்பு இறந்துபோன நாய்க்காகக் கண்ணீர்விட்டு அழுதிருக்கிறார்.

தன் உடலை தானம் செய்திருக்கிறார் கமல்.

கமலுக்கு பிடித்த டாப் டென் - 

தஞ்சை கோயில் கோபுரம் ,
அசைவ உணவு, கர்நாடக இசை - கானா பாட்டு,
 குளோஸ்- அப் கோணம்,
ஜெமினி - சாவித்ரி,
எம். ஆர். ராதாவின் நகைச்சுவை,
 காந்தியின் காஸ்ட்யூம்,
ரவிசங்கரின் சித்தார்,
சிவாஜி,
கே. பாலசந்தர்.

உலக நாயகனின் சாதனை கொஞ்சநஞ்சமா... சொல்லிக்கொண்டே போகலாம்.  இன்னும் சாதனைகளை குவிக்க உள்ள அவரை வாழ்த்த வயதில்லை.. எனவே அன்புடன் வணங்குவதே சரியானது.

உங்கள் பிரியமானவன்,