சிலருடைய பழக்க வழக்கம்

மனிதப் பிறவியினுடைய ஓர் இயல்பு நிலையானது பழக்கங்களுக்கு அடிமையாவது ஆகும்.


நல்ல பழக்கமாக இருந்தாலும் தீய பழக்கமாக இருந்தாலும் சிலகாலம் தொடர்ந்து பழகிவிட்டால் அந்தப் பழக்கத்திலிருந்து மனிதன் மீளுவது கடினம்.

நல்ல பழக்கங்களுக்கு அடிமையாகம்பொழுது அது தனிப்பட்ட அவனுக்கும் அவன் வாழும் சமுதாயத்துக்கும் அதனால் நன்மை கிடைக்கிறது.

சில பழக்கங்களை ஒரேடியாக தீமை தருவன என்று சொல்ல முடியாவிட்டாலும் அது பொதுவாக மற்றவர்கள் பார்வையில் ஒரு வித தாழ்வான - கேவலமான எண்ணத்தைத் தோற்றுவிக்கக் கூடும்.

சிலர் ஏதாவது அங்க சேஷ்டைகளைச் செய்துக் கொண்டேயிருப்பார்கள். தலையயோ கைகால்களையோ தேவையில்லாமல் அவலட்சணம் தோன்ற ஆட்டிக்கொண்டிருப்பார்கள்.

சிலர் தனிமையில் இருக்கும்பொழுது தமக்குத்தாமே பேசிக் கொள்வார்கள் அல்லது சிரித்துக் கொள்வார்கள்.

சிலர் சதா வளவளவென பேசிக் கொண்டிருப்பார்கள். காரணம் இருந்தாலும் இல்லாவிட்டாலும் இவர்கள் பேசத் தவறமாட்டார்கள்.

தமது பேச்சை எதிரில் இருப்பவர்கள் விரும்புகிறார்களா காது கொடுத்துக் கேட்கிறார்களா என்றெல்லாம் இவர்கள் யோசிக்க மாட்டார்கள்.

மற்றவர்கள் பேசுவதை இவர்கள் காதில் வாங்கிக்கொள்ள மாட்டார்கள். மற்றவர்கள் பேச வாய்ப்பே கொடுக்காமல் இவர்கள் பேசிக்கொண்டிருப்பார்கள்.

இப்படிப்பட்ட உளறு வாயர்களைக் கண்டாலே அனுபவப்பட்ட பலர் மெல்ல அவர்களைக் காணாததுபோல நழுவி விடுவார்கள். அவர்களிடம் மாட்டிக் கொண்டவர்களும் அவரிடமிருந்து எப்படி தப்பித்துக் கொள்வது என்று துடிப்பார்கள்.

இவர்களது உளறுவாய் பேச்சால் நண்பர்கள் இவர்களை மனதில் திட்டிக்கொண்டே வெளியில் காண்பிக்காமல் இருப்பார்கள்.

சிலருக்கு மற்றவர்களுடன் வாதம் செய்வதே வழக்கம். இவர்கள் வாதம் செய்வதற்கு பிரமாதமான விசயம் ஏதும் தேவையில்லை. அற்ப காரணங்களுக்காக தீவிரமாக வாதத்திலிருந்து விடுவார்கள்.

வாதம் செய்யும் போது பரஸ்பரம் விட்டுக் கொண்டு விவாதம் செய்வதற்காக பேசுவதாக இவர்கள் பேச்சு இருக்காது.

'தாம் பிடித்த முயலுக்கு மூன்றே கால்' எனபது போல தாங்கள் நினைப்பதையே பிறர் மீது திணிக்க முற்படுவார்கள்.

மற்றவர்கள் சொல்வதில் நியாயம் இருந்தால் கூட அதை ஒப்புக் கொள்ள மாட்டார்கள். தாங்கள் சொல்வதே சரியென வாதிப்பார்கள்.

இதுவும் ஒருவிதமான வெறுக்கத் தக்க பழக்கந்தான்.

புறங்கூறுவது சிலருக்கு பழக்கமாகவும், வழக்கமாகவும் இருக்கும்.

சிலர் எப்பொழுது பார்த்தாலும் மற்றவர்களைக் குறை சொல்லிக் கொண்டேயிருப்பார்கள். அப்படி ஒரு பழக்கம் இவர்களுக்கு.

மற்றவர்களைக் கேலியும் கிண்டலும் செய்து கொண்டிருப்பது சிலருடைய வழக்கம்.

இந்த மாதிரிப் பழக்கங்களால் தொடர்புடையவர்களுக்கு நன்மை ஏதும் இருப்பதில்லை. ஆனால் அவற்றால் விளையக் கூடிய தீமைகளோ சொல்லி அடங்காது.

=============================================================
ஒரு நிமிசம்:

முற்றிலும் பலம் வாய்ந்த பலவீனமே இல்லாத மனிதர் என்று உலகத்தில் யாரும் இல்லை. அதே போல், வெறும் பலவீனத்தை மட்டுமே அடிப்படையாகக் கொண்டு பலமே இல்லாத மனிதரும் உலகத்தில் இல்லை.

பலமும் ஆற்றலும், அறிவும் பெற்ற ஒரு மனிதன் தன்னிடம் அமைந்திருக்கும் அற்புத சக்திகளை உணர்ந்து சமுதாய நலனுக்குப் பயன்படுத்துவதன் மூலம், தனக்கும் தன் வாழ்க்கைக்கும் பயன்படுத்திகொள்ளத் தெரியாதவன் பலமிருந்தும் பலவீனனாகிவிடுகிறான்.

இதே போல் தனது பலத்தை ஆற்றலை ஆக்க ரீதியில் அல்லாமல் அழிவுக் கண்ணோட்டத்தில் சமுதாயத்தைச் சீரழிக்கும் நோக்கில் பயன்படுத்துபவனும் பலவீனனாகி, தோல்விகளை அடைகிறான்.

இதை இன்னும் சற்று விரிவாகக் கூறுவதாயின் பலவீனம் என்று தனியாக ஒன்று இல்லை. நமது பலம் சரியாக பயன்படுத்த முடியாத போது, தவறாக பயன்படும்போது அது பலவீனமாக மாறுகிறது. அவ்வளவு தான்.

உங்கள் பிரியமானவன்,