நெஞ்சை தழுவும் ஒத்தடங்கள்

தற்காலிகமாகத் தடைகள் சில ஏற்படக்கூடும். சில சிக்கல்களும், பிரச்சனைகளும் உங்கள் வாழ்வில் குறுக்கீடு செய்யலாம். அதற்காக மனம் தளர்ந்து விடாதீர்கள்.

சில நேரங்களில் உங்கள் வளர்ச்சியைப் பார்த்து உங்களைச் சூழ்ந்தவர்களே பொறாமை கொள்ளக்கூடும். அதற்காக நீங்கள் வருத்தப்பட தேவையில்லை.

 உங்களைச் சாதாரணக் கல் என்று எண்ணி ஏளனம் செய்தவர்களுக்கு உங்கள் வளர்ச்சி அதிர்ச்சியைக் கொடுக்கலாம்.

 ஏன், அச்சத்தைக் கூடக் கொடுக்கலாம். அதன் காரணமாக அவர்கள் உங்கள் மீது காழ்ப்புணர்ச்சி கொள்ளக்கூடும்.

எதற்காகவும் நீங்கள் கலங்கி விடாதீர்கள். உங்கள் வெற்றிக்கும், முன்னேற்றத்திற்கும் அவர்கள் தான் காரணம் என்று எல்லாரிடமும் எடுத்துச் சொல்லுங்கள். 

இவ்வாறு நீங்கள் சொல்வது நிச்சயம் அவர்களின் காதுக்குச் செல்லும். இவ்வாறு அவர்களே உங்கள் முன்னேற்றத்திற்குக் காரணம் என்று சொல்வதைக் கேட்டு அவர்கள் திருந்தி விடுவார்கள்.

இது போன்ற மனித உறவு அணுகு முறையின் மூலமே அவர்களை வெல்ல முடியும்.

 பாலில் கலந்த தயிர் எப்படி எல்லாப் பாலையும் தயிர் ஆக்கி விடுகிறதோ, அது போல் அவர்களின் மனதில் கலக்கும் உங்கள் நல்ல எண்ணம் அவர்களது நச்சு நெஞ்சை நல்ல மனமாக மாற்றி விடக்கூடும். 

உங்கள் மீது உள்ள பொறாமைக்குணம் முற்றிலும் மறைந்து உங்கள் முன்னேற்றத்திற்கு மீண்டும் உதவத் தொடங்குவார்கள்.

இது தான் சிறந்த வழி. ஆகவே யாரையும் குறை படாதீர்கள். அவர்களின் செய்கைக்காக வருத்தப்படாதீர்கள்.

நல்ல எண்ணங்களை விதையுங்கள். நட்பு மலரும், நட்பு மலர்களே நெஞ்சைத் தழுவும் ஒத்தடங்கள்.

 பூக்கள் சருகு ஆகும். முன்னர் மனத்தைப் பரப்பிச் சுகத்தை ஏற்படுத்துகின்றன. அது போல, உங்கள் வாழ்நாள் தீர்வதற்குள்ளாக வரலாறு படையுங்கள்….   வாழ்த்துக்கள்

நன்றி – சிகரங்களைத் தொடுவோம் புத்தகத்திலிருந்து ஆசிரியர் சிந்தனைக் கவிஞர் கவிதாசன் அவர்கள் ( சிகரங்களை தொடுவோம் – குமரன் பதிப்பகம்,3,முத்துக்கிருஷ்ணன் தெரு, பாண்டி பஜார், சென்னை -17 )