சும்மா நிக்காதீங்க

வாழ்க்கையில் முன்னேற எல்லாருக்கும் ஆசை தான்... அதற்கு மூலதனமே உழைப்பு தான்...  உதாரணத்திற்கு உழைப்பால் முன்னேறியவர்களையும், முன்னேற முடியாமல் இருக்கும் காரணங்களையும் இன்றைய பதிவில் பார்ப்போம் அன்பர்களே!

மனித குலத்திற்கு சேவை செய்வதையே மூச்சாகக் கொண்டு இறுதிவரை உழைத்தவர் அன்னை (ஆக்னெஸ் ) மதர்தெரஸா அவர்கள்.

கவிஞர் கண்ணதாசனிடம் அவரது தாயார் சொல்லிய வார்த்தை : "உலகில் நீ எந்த வேலை வேண்டுமானாலும் செய். குப்பை அள்ளுகிற வேலையாக இருந்தாலும் உன்னைவிட அதை வேறு யாரும் சிறப்பாக செய்ய முடியாது என்று மற்றவர்கள் சொல்ல வேண்டும். அந்த அளவிற்கு ஈடுபாட்டுடன் உழைத்து செயல்படு." அதன் படி வாழ்ந்து மறைந்த கவிஞரின் உழைப்பை இந்த உலகம் அறியும்.

திறமை இருந்தும் உழைக்காமல் இருந்திருந்தால் பல்லாயிரக்கணக்கான கவிதைகளை எழுதித் தள்ளி இருக்க முடியாது?.

ஒரு சதவீதம் அறிவு..99 சதவீதம் உழைப்பு... இது தான் எனது வெற்றிக்கு காரணமென தன்னடக்கத்துடன் கூறியவர்... தாமஸ் ஆல்வா எடிசன் அவர்கள்.

திரைப்பட நடிப்புத்துறையில் ஒரு திலகமாக இன்றளவும் போற்றப்படும் நடிகர் சிவாஜிகணேசன் அவர்கள்...

*******

திறமையிருந்தும், அறிவிருந்தும் முன்னேறாமைக்கு முக்கிய காரணம் இயல்பாகவே சிறுகுழந்தையிலிருந்தே சோம்பேறியாக இருந்து பழக்கப்பட்டவர்கள். ''தொட்டில் பழக்கம் சுடுகாடு வரை" என்பதற்கு இணங்க சிறுவயது முதலே எந்த விசயத்திலும் உழைக்கத் தயங்குவார்கள்.

இவர்கள் தாங்களாகவே தங்கள் சுறுசுறுப்பின்மையை உணர்ந்து உழைக்கப் பழகிக் கொண்டால் மட்டுமே முன்னேற்றம் காணமுடியும்.

பிறர் உழைப்பில் வாழ்ந்து பழக்கப்பட்டவர்கள் தாமாக உழைக்க நினைப்பதில்லை.

மனதளவில் தைரியம் இல்லாதவர்கள், சிறு நஷ்டம் தோல்விக்கே துவண்டு போய் விடுபவர்கள். ஒரு முறை சிறு சரிவு ஏற்பட்டால் அதையே நினைத்து கலங்கிப்போய் விடுபவர்கள்

'உழைத்தும் பிரயோஜனமில்லை' என்று பேசிக்கொண்டு உழைக்கத்தயங்குவார்கள்.

உடல் நிலையில் சிறிய கோளாறு ஏற்பட்டாலும் அதையே பெரிய வியாதியாக நினைத்து வீண்கற்பனை செய்து கொண்டு,

 உழைத்தால் மேலும் உடற்கோளாறு ஏற்படும் என்று தாமாகவே முடிவு செய்து கொண்டு உழைக்க அஞ்சுபவர்கள்.

வாழ்க்கையில் பெரிய இழப்பை சந்தித்தவர்களும் உழைக்கப் பிடிக்காமல் விரக்தியடைந்த நிலையில் இருப்பவர்களும் வாழ்க்கையின் சுவராஸ்யத்தை இழந்து உழைப்பில் அக்கறை காட்டுவதில்லை.

வாழ்க்கையில் உயர நினைப்பவர்கள் முதலில் உழைப்பை நேசிக்கக் கற்றுக்கொள்ள வேண்டும்.

உழைப்பையே சுவாசமாக கருத வேண்டும். உழைப்பையே தவமாக கருத வேண்டும். உழைப்பையே தியானமாகக் கொள்ளவேண்டும்.



நன்கு உழைக்கும் போது கிடைக்கும் மன நிறைவில் கடவுளையே காணலாம்.

உங்கள் பிரியமானவன்,